الجمعة، 21 يناير، 2011


أغـنـيـة جـربـت كـلمات : صـابر كمال




كلمات : صابر كمال
الحان وغناء : نادر نور
توزيع : كريم عبد الوهاب








أرجوك كفايه ومتقولهاش انا همشي وابعد من نفسي
وسامحني لو قلّيت راحتك او يوم فرضت عليك نفسي

محتاج اقولّك كلمتين .. وبجد بعديهم همشي
واعذرني يعني عشان يمكن تسمعني بس ماتفهمشي
اصل الكلام ده فيه حاجات تتحس بس ماتتقالشي

جرّبت تعمل كل شئ علشان تحبب حد فيك ؟
وتلاقي رد بيوجعك باين في كل كلامه ليك ؟
بس انت عايش ع الأمل يمكن في مره يحس بيك

جرّبت لما تبصله تلقاه اوام يبعد عينيه ؟
وتحس لما تكلمه ان انت حمل تقيل عليه ؟
إحساس محدش يفهمه غير اللي حسه ومر بيــــه

جرّبت لما يكون حزين تبقى انت مش قادر تنام ؟
وان حد قال انه اتجرح تلقى الدموع سابقه الكلام ؟
هو يدوب يقول الـ آه وانت اللي بتحس الألام

جرّبت تقبل كل يوم يجرح مشاعرك و يدوسها ؟
عمال يحمّل قلبك لوم على كلمه مقدرش يحوشها
جرب آلامي وابقى قول هتحس ايه لما تعيشهـــــا






============




هانى شاكر يامصر


كلمات : صابر كمال
الحان : خالد جنيدى
توزيع : حازم رأفت





لكل شئ وقت وميعاد واهو جه ميعادك .. كان حقى ضايع والنهاردة خلاص رجعلى
وعشان نشوفك واقفة تـتباهـى بـولادك .. حالـفـيـن يـامـصر بـايدنـا فـوق الـكـل تعلى

جايلك وايه يابلادى غير حبى جايبنى
حبى اللى باقى لحد لما الروح تسيبنى
تلاقينى واقف ايد بتحمى وايد بتبنى

نحلف تملى الحب يجمع بيننا فيكى
وفـ كل محنة تلاقى ايد بتعدى بيكى
نزرع تعبنا نشوفه خير باين عليكى




===========

قصيدة لمن يهمها الامر

قصيدة لمن يهمها الامر لصابر كمال





بقى ده اللى جايبك ؟؟ بقى ده اللى جايبك ؟؟ بقى ده اللى جايبك ؟؟

لما قالولى حضرتك طالب تشوفنى سألت ليه قالوا كده
هوه قال : قولولها بس ان اسمه ايه عايز يشوفها وهيه هتلبى الندا
ساعتها قلت انا دنيتى مفيهاش بشر متسميين بالاسم ده

تانى مرة قالولى قال ليها حقوق لازم تاخدها
ومش هينفع حد يجى لازم الكلام يبقى فى وجودها
عايز الحقيقة ؟من ساعتها وانا الميعاد ده حاسباله باليوم والدقيقة

واما لمحتك جاى وشايل من بعيد
لخصت حيرتى ولهفتى فى سؤال وحيد
هو اللى ليا فى ذمتك يتشال فى ايد ؟

رفعت عينى لقيتك جاى بتبصلى وداخل حامى
وقبل سلامات وازيك نزلت حاجتك قدامى

وقلت انا مش جاى اقعد ولا عايز آخد من وقتك
مادام اللى بيننا خلاص نهيناه يبقى الحاجات دى بقت حاجتك

-لكن انا مطلبتهاش-
بلاش تمانعى ولا تعاندى
انا سبتلك حاجتك عندك معادش ليها مكان عندى

وقبل ما امشى
متشيليش نفسك منى وفى اللى فات انسى وسامحى
واهو كلها ايام وشهور وهيبقى من عقلك ممحى

بقى ده اللى جايبك ؟؟
حبة هدايا وشنطة وشوية لعب
لخصت فيهم عمر بالدمع انكتب
رخصت بيهم ماضى على عمرى اتحسب
ده اللى هاخد حقى بيه

وازاى فى عينك شايفة صورة فرح تم
وانت مالى ليالى عمرى الآم وهم
ده اللى زيك لو لمحنى وعنده دم
يجرى على حيطة تدارية

لو رد حقى صحيح جايبك .. دور وفتش فى مجايبك
وفى قلب شيلتك مد ايديك واطلعلى منها باكبر كوم
عايزة اللى ضايعة من عمرى عليك يتردلى على داير يوم

قابلتك والوجود شايف وجودك فى الحياة ازمة
بفضل ونعمة من ربى انا اللى عملتلك لازمة
ده ماضى وكل ما افتكرة ويورد ع اللسان ذكره
بتصغر قيمتى فى عينيا وبضرب نفسى ميت جزمة

جوة عيشة كل واحدة لو تقلّب تلقى نكسة
والسبب مش حلم خيّب او ظروف كانت معاكسة
السبب ان الرجولة خيبت فيها العشم
فصلت لبس البطولة ومثلت دور الحشم
واللى باقى الوقت منها صورة مرسومة بغشم

بص يابنى
هيه عادة طبع فيا انى بحكم باللى باين
رامية عقلى ورافضة شورته وسايبة عينى تدور تعاين
فاللى زيى حياتها غلب وعايشة عرضة لكل خاين
واللى زيك سوقه ماشى ومش ملاحق ع الزباين

م اللى بيشوفك لايمكن يفتكر انك تضره
واللى بيشاركك فى قعدة الكلام وياك يسره
كدب طالع بالمقاس شكل يدى على ابن ناس
واللى بتغره المظاهر هيئتك لازم تغره

خليتنى احس معاك بأمان علشان اسلم قلبى ليك
وقطعتنى من كل الناس علشان اعيش مربوطة بيك
زودت من جرحك ليا وربطت علاتك بيا
وده مش عشان عيب كان فيا ده عشان تكمل نقص فيك

سنين بفرد قلوع حلمى وبعليها
وانام متخيلة صورتك واقوم بيها
وبحسد نفسى ع الأملة اللى انا فيها

واما طال بيننا الاجل .. الخلاف كانله فى حياتنا ميعاد وحصة
واختفى الذوق والخجل ... اللـى بيـغـلـف بـدايـة اى قـصـة

وابتدت حـبـة حـاجات وتـصرفـات منك تبان
كنت كل ما احجمك او اسد باب تفتح بيبان

قلتلى ليه المشاعر تبقى صادقة وتتكتم
مادام اللى بيننا هيبقى بيينا وبالحلال راح يتختم

ولا يوم طلعت من الكلام وياك بحاجة
نفس الردود نفس الوعود نفس الديباجة

ولو خرجنا واتجاوزت وقلت اصدك شويه
تزغرلى وتربع ايديك وفى ثانية تقلب عليا

وشويتين ونقوم سوا ... وما اشوفش غير بوز اتلوى
ومهما احاول الم فيك .. تعمل خناقة من الهوى

واقول فى ايه ? تقول مفيش
 ياحبيبى مالك ... الله ما ليش
اما انتى مش طيقانى جنبك
عرفينى عشان ما اجيش

وشويه واطلع ببعدك .. وبصدى عايزة اضعيك
ومخوناك .. وفى ود غيرى بطمعك
ومهمشاك .. وبطبعى عايزة اطبعك

غصب عنى لقيتنى قابلة .. وراضية عن جو المقابلة
والنهاردة بدأت افهم ... قـد ايـه انـا كـنـت هـبلة

ما ابتديتش ارخص فى عينك وانحنى لكبرك واسايس
وفى عتب حرمة ولائى القى نعل الشك دايس
الا لما فردت شعرى وطلتنى حاضن وبايس

بس تعرف .. انت صادق
م اللى فاتحة فى يبتها شق بيتدخلله من الخنادق
واللى تدى لحد حق بفعلة يعلى على المبادئ
بعد ما بيعصر عفافها طعم شوقها بيبقى حادق

دموعى اترجوا واتحايلوا لحد ما دبّلوا رموشى
اقوللك دارى على غلطك تقول حوشى العفاف حوشى
آه يابن الكلب ما انت خلاص
تتعب ليه عشان حاجة قدرت تاخدها بلوشى

سنين غدرك ماهيش غلطة هيلفحها الندم وتسيح
ويبدرها الأسف فى الريح
متتعشمش تلقى كلام يداوى الطعن والتجريح
ده مش كل الذنوب ينفع نكفر عنها بالتسبيح

ياريت فى الباقى من عمرك تجيب الدنيا غرب وشرق
وعاشر غيرى واتلطم عشان تعرف تحس الفرق

برأت نفسك من حقى
شوهت عمرى المتبقى
وهتفرز الناس وتنقى
ولا حد هيشك فى سيرك

وهتلقى صوت بالحق ناداك
وقال وهوه بيتحداك
مخدتهاش مشيت معاك
هتاخدها مشيت مع غيرك

قصيدة المهم المعنى يوصل





بتبسط لما تشوفينى ويغمرك فرحك بعشقى
بس لحظة شوقى ليكى قد ما بتسعِد بتشقِى
مشتكى عطشى لخدودك متسيبيه يشرب ويسقى
تضحكى وتقولى هانت بس ما استعجلش رزقى

وتقولى كتر البص للمياه اكيد يروى اللى شايف
بقى برضو كتر البص للمياه اكيد يروى اللى شايف
ياحبيبتى حاسبى وربى حسبى من كلام ملفوف وزايف
ده العطش يهرى اللى صايبه وينمحى بحبة رشايف
روحنا تروى القلب منها وريحها يفضل فى الشفايف

ياحبيبتى .. المشاعـر مش مـجـرد نـظرة دافـية وكلـمة ناعمة
تفرق ايه .. طبطبة على كتف ميت وإبتسامة فى وش أعمى

صدقينى .. مش مهم الفعل يحصل .. المهم المعنى يوصل

من زمان رابط رجولتى عن عاداتى وعن أنوثتك
يجرى ايه لو مرة قلتى فك طوقها وروحت بوستك

إنتى عارفة ؟

عـن مـحاسن ربـى متـع بيـها غيـرك قلبـى زاهد
وبإيمـانك بيـا بقـوى وفـى سبـيل راحتـك بجـاهد
لا اللى بيكى رابطنى عهد ولا اللى ضامن حبى شاهد
والأمان فى ايدين بتعمل مش لسان يفضل يناهد
واللى حب وقـوله فـعل أبـرّ واصدق م اللى عاهد

وانا هبقالك صحبة تآنسك موجة بهمسك تعلى وتجرى
انا ابـقـالـك مـنك ليـكـى وبـاقـى عليـكـى لآخـر عمرى
حاوطى عليا خدينى لنفسك .. مِـلـك مـحـدش فـيـه هـيـنافسك
حلم معدى حدوده ولامسك .. ليكى فى نفسى ما ليكى فى نفسك

انتى هنايا وقدرى وقاسمى
وانتى غنايا وشعرى ورسمى
وانتـى بـلادى واهـلى وزادى
وصحبة ليلى وطرح مواسمى

تعبى ودمعى احايلهم بيكى
ضلّى وخيرى شايلهم ليكى
حتى ان بان معروفى لغيرك
شايلـه ليـوم يتردلى فيكى

لاهو إعجاب ولا ميل ولا شدّة ولا يوم عدى وشوق بيروح
حبك فـضل وقسـمـة عـدل وحـسـبـة عـقـل وقـلـب وروح
إنسى الدنيا وآنسى عينيا وإرضى هترضى حياتى عليا
يجى م الدنيا نصيبى انا يبكى .. ونصيـبـك تاخـديـه بايديا

طـايشة وحـرّة وسـهلـة ومـرّة وقلبـك درّة فـى رقـبـة مهر
زاهية وطارحة ومنبع فرحة وطلة حسنك شمس فى ضهر
طبـعـك خلى محـدش جـاهلك .. زاينـة بـأدبك سيـرة اهلك
لو مفروض تتجازى بقيمتك يبقى مفيش مخلوق يستاهلك



قصيدة انا وسلوى





الحب مرضى ودائى .. وده فطرة وشئ بدائى
لاهو حاجة مخترعها .. ولا شئ جايبة بذكائى

اخترته طريق ومنهج .. وانا عيل فى ابتدائى
قالولى ياواد هتنهج .. انا قلت جواب نهائى

اول حكاياتى سلوى .. بنوتة فى رابعة تالت
مخدتش فى ايدى غلوة .. يادوب رمشين ومالت

كنت احب اكتب حروفنا وجنبهم قلب وسهوم
ما اباتش يوم من غير ما اشوفها وابات شهور من غير حموم
واما تهف عليا واذاكر.. يجى الصبح بقدرة قادر
القى واجب الانجليزى جوه كراسة العلوم

كان اخوها طويل وجتّه .. ويفصل منى ستّة
انا اشوفه جاى معاها .. اتدارى فى اى حتّة

ماهو حد فقعنى بومبة .. وعِرِف سبع البرومبة
واكيد لو مرة شافنى .. هيكون على ايده دفنى

وفى يوم بعتلى واحد رمى كلمة عليا وراح
قاللى اللى انت عارفه عايزك بعد المرواح

واما يادوب خطّيت م الباب ... لسه ببص لقيت سى هباب
هيه ثوانى لـقيـته مـقـرّب ... جايـلى ولامـم سـت كـلاب

قلت صحابى هيبقوا معايا .. ونهجم مرة واحدة عليهم
واما وصلت ببص ورايا .. مشفتش غير عفار رجليهم

اتحلقلى ساعتها حلقة ... واتخبطـت يومـيها عـلـقـة
الملـخـص والـنـتـيـجة ... كل حاجة فى وشى زرقا

تانى يوم لقيتها جايّة .. ماشية بتقرب عليّا
وبهدوء على ودنى مالت .. وبرزانة وعقل قالت :

لا الـكـلام مـمكـن يـخـفـف او يـهـوّن اى بـلـوة
بس جاية وحابّة اقوللك هو مين فينا اللى سلوى !!!




رد مع اقتباس